ဆင်ကြိုရွှေကူကပ်ကျော်ဘုရား၊ အမရပူရ၊ မန္တလေး

ဆင်ကြိုရွှေကူ ကပ်ကျော်ဆုတောင်းပြည့်ဘုရားကြီး အခုတော့ ဘုရားဝင်းတခုထဲမှာရှိနေပေမဲ့လို့ သံသေကပ်ကျော်ဘုရားက သပ်သပ်၊ ဆင်ကြိုရွှေကူ မြို့ထောင့်စေတီတော်က သပ်သပ်ဖြစ်ပါတယ်။ ဆင်ကြိုရွှေကူစေတီတော်ရဲ့သမိုင်းကတော့ အမရပူရမြို့တည်နန်းတည်မင်းဖြစ်တဲ့ ဘိုးတော်ဗဒုံမင်းဟာ အမရပူရမြို့တော်မှာ AD 1783 စတင် နန်းစံခဲ့ပြီး နောက်တနှစ်မှာ မြို့ထောင့်စေတီလေးဆူကို စတင်တည်ထားခဲ့ကြောင်းသိရပါတယ်။ ဆင်ကြိုရွှေဂူစေတီက မြို့ထောင့်စေတီလေးဆူထဲမှာ အနောက်မြောက် ထောင့်မှာရှိတဲ့ ဘုရားစေတီဖြစ်ပါတယ်။ ဒီစေတီတော်မြတ်ကိုတော့ အလောင်းစည်သူမင်းရဲ့ သရကွန်ငါးပိုင်း အဝင်ဖြစ်ပြီး ဆင်ကျိုးရွှေကူ၊ ဆင်ကျိုရွှေကူ၊ ဆင်ကြိုရွှေကူ” စတဲ့ အမည်မူကွဲများနဲ့တွေ့ရပါတယ်။ ဘုရားဖူး လမ်းညွှန် မန္တလေး -စစ်ကိုင်းလမ်းအတိုင်း "အမရပူရမှ ကြိုဆိုပါ၏" ဆိုင်းဘုတ် အလွန် (ရွှေရင်းရဲ ဘုရား အကျော်) မီးပွိုင့်ရှိတဲ့ လမ်းခွဲမှာ ညာဘက်လမ်းကြောအတိုင်းသွားရင် မကြာခင် ညာဘက်ခြမ်းမှာတွေ့ရမှာဖြစ်ပါတယ်။ ကန်တော်ကြီးကလာရင်လည်း ကွေ့ဝင်လို့ရတဲ့ လမ်းတွေရှိပါတယ်။ ကားနဲ့ဝင်ချင်သူတွေအနေနဲ့ မန္တလေး-စစ်ကိုင်းလမ်းပေါ်က သံသေကပ်ကျော်ဘုရားမုခ်ဦးဘက်ကဝင်ရင်တော့ ရှာရလွယ်ပြီးပိုအဆင်ပြေပါတယ်။ ဆင်ကြိုရွှေကူဘုရားရဲ့တောင်ဘက်မှာ ဘိုးတော်ဗဒုံမင်းလက်ထက်က ရတနာပုံပိဋကတ်တိုက်ရှိပါတယ်။ဒီပိဋကတ်တိုက်ဟာ ဗဒုံမင်း အမရပူရမြို့ကိုတည်စဉ် တစ်ပြိုင်တည်း ပန္နက်ချတဲ့ ခုနှစ်ဌာန မှာလည်း တစ်ဌာန အပါအဝင်ဖြစ်ခဲ့ပါတယ်။မြို့တည် ခုနှစ်ဌာန ကတော့ - မြို့၊ ကျုံး၊ ရွှေနန်း၊ ရွှေဂူ၊ ကျောင်း၊ ပိဋကတ်တိုက် နဲ့ ကန် တို့ပဲဖြစ်ကြပါတယ်။ နောက်ပြီး ဆင်ကြိုရွှေကူဘုရားရဲ့အနောက်တောင်ဒေါင့်မှာ ဘိုးတော်ဗဒုံမင်းလက်ထက်က ဗားမဲ့ဆရာတော်ကြီးရဲ့ သံသေခေါင်းလောင်းများနဲ့ သွန်းလုပ်ပူဇော်ခဲ့တဲ့ သမိုင်းဝင် သံသေကပ်ကျော်ဘုရားနဲ့ လည်းရှိပါတယ်။ Ref. နောင်လတ်(မန်း)၏အမရပူရဘုရားများပို့စ်မှ